• 13.11.2018 / Dövlət Fitosanitar Xidmətinin əməkdaşları Özbəkistanda rəsmi səfərdədir
  • 13.11.2018 / Bölgələrdə siçanabənzər gəmiricilərə qarşı mübarizə tədbirləri davam etdirilir
  • 13.11.2018 / Lənkəran rayonunun sitrus bağlarında çılpaq ilbizlərə qarşı mübarizə başlayıb
  • 07.11.2018 / Şəki-Zaqatala bölgəsinin fındıq bağlarında heç bir zərərverici aşkar edilməyib
  • 06.11.2018 / Şəkidə yaponiya yalançı qalxanlı mumlu yastıcası aşkar edilib
  • 05.11.2018 / Şəkidə siçanabənzər gəmiricilərə qarşı mübarizə aparılır

19 Noyabr 2018
Dont risk

Xəbərlər

01.11.2018 / Kənd Təsərrüfatı İşçiləri gününə həsr olunmuş təntənəli yığıncaq keçirilib

Kənd Təsərrüfatı Nazirliyində 1 noyabr - Kənd Təsərrüfatı İşçiləri Gününə həsr olunmuş təntənəli yığıncaq keçirilib. Yığıncaqda çıxış edən kənd təsərrüfatı naziri İnam Kərimov bu əlamətdar gün münasibətilə tədbir iştirakçılarını təbrik edib.

Nazir bildirib ki, Azərbaycan böyük əkinçilik ənənələrinə malik ölkələrdən biridir:

“Ümummilli lider Heydər Əliyevin siyasi iradəsi və gərgin əməyi ilə həm keçmiş sovetlər dönəmində, həm də müstəqillik əldə olunduqdan sonra bütün sahələrdə olduğu kimi aqrar sahədə də ciddi islahatlar aparılıb, resurslardan səmərəli və məqsədyönlü istifadə təmin olunub, sahənin dayanıqlı inkişafı üçün möhkəm baza yaradılıb. Əsası Ümummilli lider tərəfindən qoyulmuş və hazırda cənab Prezident tərəfindən davam etdirilən uğurlu aqrar siyasət nəticəsində kənd təsərrüfatı ölkə iqtisadiyyatında xüsusi yerə sahib olmuşdur”.

İnam Kərimov qeyd edib ki, aqrar sektor əhalinin ərzaq təhlükəsizliyinin təminatında böyük rol oynayır:

“Aqrar sahə həm də əhalinin ən böyük məşğulluq sahəsidir. Hazırda ölkədə ailə üzvləri də nəzərə alınmaqla təxminən 1,5 milyon insan öz dolanışığını, maddi təminatını kənd təsərrüfatı sektorunda çalışaraq təmin edir. Bu o deməkdir ki, bu əlamətdar gün Azərbaycanda həm də təxminən milyon yarım insanın peşə bayramıdır”.

Kənd təsərrüfatı nazirinin sözlərinə görə, ölkədə həyata keçirilən aqrar islahatlar bu sahənin dinamik inkişafını təmin etməklə yanaşı, məşğulluq problemini də önəmli dərəcədə həll etmişdir:

“Təsadüfi deyil ki, kənd təsərrüfatı bölgələrdə ən çox iş yerləri yaradılan, kənd sakinləri üçün ən böyük gəlir və məşğuliyyət mənbəyi olan sahəyə çevrilmişdir. Dövlətin aqrar sahənin inkişafına verdiyi dəstək insanların kənd təsərrüfatına marağını daha da artırmışdır. Bu sahədə çalışanların sayı ildən-ilə artır, eyni zamanda kənd təsərrüfatında hər il daha çox innovativ yeniliklər tətbiq olunur. Artıq Azərbaycan fermerinin obrazı, siması tam dəyişib. Müasir fermer innovasiyaların tətbiqinə meylli, müasir becərmə üsullarına bələd olan, satış şəbəkəsi qurmaq üçün sosial şəbəkələrin imkanlarından istifadə edən, dünyagörüşlü vətəndaşdır. Bu vətəndaşlar ölkədə aqrar inkişafın aparıcı qüvvəsi sayılırlar”.

Nazir bu gün aqrar sahədə əldə edilən uğurlar və yüksək nəticələrin Azərbaycan Respublikasının Prezidenti cənab İlham Əliyev tərəfindən çox yüksək qiymətləndirildiyini deyib. Bu günlərdə dövlət başçısının kənd təsərrüfatı sektorunda çalışan 42 nəfəri fəxri ad, orden və medallarla təltif etdiyini xatırladan İnam Kərimov göstərdiyi yüksək diqqət və qayğıya görə aqrar sektorda çalışan insanlar adından Prezident İlham Əliyevə minnətdarlığını bildirib.

Tədbirdə çıxış edən Azərbaycan Respublikası Prezidentinin aqrar məsələlər üzrə köməkçisi Azər Əmiraslanov yığıncaq iştirakçılarına dövlət başçısının salam və təbriklərini çatdırıb. O bildirib ki, Azərbaycan Respublikasının Prezidenti cənab İlham Əliyevin 2008-ci ildə imzaladığı Fərman əsasında hər il 1 noyabr tarixinin Azərbaycanda Kənd Təsərrüfatı İşçiləri Günü kimi qeyd olunması dövlətin fermerlərə göstərdiyi diqqətin təzahürüdür:

“Bu, həm də onu göstərir ki, kənd təsərrüfatının inkişafı dövlətin yürütdüyü siyasətdə hələ də prioritet sahə olaraq qalmaqdadır”.

Daha sonra Azər Əmiraslanov Prezident İlham Əliyevin kənd təsərrüfatı sektorunda çalışan bir qrup şəxsin fəxri ad, orden və medallarla təltif olunmasına dair imzaladığı Sərəncamı oxuyub, təltif olunan şəxsləri təbrik edib:

“Fermerlərin cəmiyyətdə xüsusi yeri var. Bu səbəbdən cənab Prezident bu sahəni həm iqtisadi, həm də sosial sahə hesab edir. Aqrar sahədə islahatlar davam edəcək. Kənd təsərrüfatına dövlət dəstəyinin daha səmərəli həyata keçirilməsi, ünvanlılığın təmin olunması vacibdir. Prezidentin də kənd təsərrüfatı işçilərindən gözləntiləri var. Fermerlər daha keyfiyyətli məhsul istehsal etməlidir. Əminəm ki, dövlətin dəstəyini həmişə hiss edən aqrar sektorun təmsilçiləri ilə birgə daha böyük uğurlara imza atacağıq”.

Milli Məclisin aqrar siyasət komitəsinin sədri, millət vəkili Eldar İbrahimov Azərbaycanın MDB məkanında ən dinamik inkişaf edən ölkə olduğunu deyib, Prezident İlham Əliyevin yürütdüyü aqrar siyasətin prioritetləri barədə məlumat verib. Millət vəkili növbəti ilin dövlət büdcəsində kənd təsərrüfatına vəsaitin 13,9 faiz artırılmasının nəzərdə tutulduğunu deyib. Ölkədə ilin sonuna kimi daha 13 aqroparkın istifadəyə veriləcəyini deyən Eldar İbrahimov bildirib ki, kənd təsərrüfatının inkişafı üçün müvafiq infrastrukturun daha da yaxşılaşdırılması istiqamətində işlər görülür. Aqrar sahənin qanunvericilik bazasının daha da təkmilləşdirildiyini deyən millət vəkili Milli Məclisin adından kənd təsərrüfatı işçilərini peşə bayramı münasibətilə təbrik edib.

Prezidentin imzaladığı sərəncamla təltif olunan Bədrəddin Həsrətov, Teymur Bəhramov, Bayram Əlləzov, Fatma Hüseynova verdiyi dəyərə görə dövlət başçısına minnətdarlıqlarını bildiriblər. Toplantıda Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyevin kənd təsərrüfatı işçilərinə təbrik məktubu oxunub.

Tədbirin sonunda Kənd Təsərrüfatı İşçiləri Gününə həsr olunmuş təntənəli yığıncağın iştirakçılarının Azərbaycan Respublikasının Prezidenti cənab İlham Əliyevə müraciəti qəbul olunub.

Müraciətdə bildirilir ki, Prezidentin imzaladığı son fərman və sərəncamlar, eyni zamanda aqrar sahəyə göstərdiyi daimi diqqət və qayğı nəticəsində kənd təsərrüfatının bütün sahələri dinamik inkişaf edib, köklü dəyişikliklər baş verib və zəruri potensialın formalaşdırılması üçün məqsədyönlü tədbirlərin icrası uğurla davam etdirilir. İştirakçılar göstərdiyi diqqət və qayğıya görə, aqrar sahənin işçiləri, fermer və sahibkarlar adından dövlət başçısına dərin minnətdarlıqlarını bildiriblər.



1 2 3 4
Copyright by DFNX, 2015
AZ 1106, Bakı şəhəri, N.Nərimanov küçəsi, 7a
(012) 562-87-60 (012) 562-82-45